អន្តរជាតិ៖ អង្គការឧតុនិយមពិភពលោក ឬ World Meteorological Organization (WMO) ថ្លែងថា កាលពីឆ្នាំ ២០២៣ កន្លងទៅ មានការបំបែកកំណត់ត្រាអាកាសធាតុពិភពលោកសំខាន់ៗរួចទៅហើយ ខណៈគេសម្លឹងឃើញថាស្ថានភាពអាកាសធាតុនៅក្នុងឆ្នាំ២០២៤ នឹងកាន់តែអាក្រក់ជាងឆ្នាំមុនៗទៅទៀត ដោយប្រធានស្ថាប័នឧតុនិយមពិភពលោកសម្ដែងនូវក្ដីព្រួយបារម្ភជាខ្លាំង ចំពោះបញ្ហានៃការកើនឡើងកំដៅទឹកសមុទ្រ និងការបន្តរលាយផ្ទាំងទឹកកក។

ទីភ្នាក់ងារទទួលបន្ទុកផ្នែកអាកាសធាតុនៃអង្គការសហប្រជាជាតិនេះនិយាយថា នៅក្នុងរបាយការណ៍ប្រចាំឆ្នាំនៃអាកាសធាតុពិភពលោកបង្ហាញថា សីតុណ្ហភាពជាមធ្យមបានឈានដល់កម្រិតខ្ពស់បំផុតក្នុងរយៈពេល ១៧៤ឆ្នាំចុងក្រោយ។ WMO បញ្ជាក់ថា សីតុណ្ហភាពទឹកសមុទ្រក៏បានឡើងកំដៅខ្លាំងបំផុតមិនធ្លាប់មានក្នុងរយៈពេល ៦៥ឆ្នាំ ដោយជាង ៩០ភាគរយនៃមហាសមុទ្របានជួបប្រទះនឹងស្ថានភាពរលកកំដៅខ្លាំង ដែលបង្កជាហានិភ័យប៉ះពាល់លើប្រព័ន្ធវដ្តផលិតអាហារសមុទ្រផងដែរ។

អគ្គលេខាធិការ WMO លោកស្រី Celeste Saulo ដែលទើបចូលកាន់តំណែងកាលពីខែមករាកន្លងទៅថ្លែងថា៖ "អង្គការឧតុនិយមពិភពលោកកំពុងប្រកាសអាសន្នកម្រិតពណ៌ក្រហមដល់ពិភពលោក"។ លោកស្រីបន្តថា៖ "អ្វីដែលយើងបានឃើញកាលពីឆ្នាំ២០២៣ ជាពិសេសជាមួយនឹងការកើនឡើងកំដៅមហាសមុទ្រដែលមិនធ្លាប់មានពីមុនមក ការរលាយផ្ទាំងទឹកកកកាន់តែច្រើនឡើង ជាពិសេសផ្ទាំងទឹកកកនៅទ្វីបអង់តាក់តិច សុទ្ធតែជាអ្វីដែលយើងព្រួយបារម្ភខ្លាំង"។ អ្វីដែលរឹតតែគួរឱ្យបារម្ភជាងនេះទៅទៀតគឺ ស្ថានភាពកំដៅមហាសមុទ្រដែលកំពុងមាននេះ អាចត្រូវការពេលរាប់រយឆ្នាំដើម្បីអាចឱ្យវាវិលមកស្ថានការណ៍ដើម​​វិញបាន។ 

អ្នកវិទ្យាសាស្ត្រផ្នែកអាកាសធាតុប្រចាំ WMO បានថ្លែងប្រាប់អ្នកសារព័ត៌មាននៅថ្ងៃពុធនេះថា សីតុណ្ហភាពមធ្យមពិភពលោកបានកើនឡើងប្រមាណ ០,២អង្សារសេ ដែលជាការកើនឡើងខ្ពស់បំផុតមួយ។ អ្វីដែលជាការកត់សម្គល់នោះគឺក្នុង​រយៈ​ពេល​ប៉ុន្មាន​ទសវត្សរ៍​ចុង​ក្រោយ​នេះ សីតុណ្ហភាព​ជា​ទូទៅ​បាន​ឡើង​កម្តៅ​ក្នុង​អត្រា​ប្រហែល ០,២ ទៅ ០,២៥អង្សាសេ​ក្នុង​មួយ​ទសវត្សរ៍៕